උන් වහන්සේ ස්ත්‍රියට කතා කොට නුඹේ
ශෝකය හා ගැබ් ගැනීම් බොහෝ සෙයින් වැඩි කරන්නෙමි, නුඹ වේදනා සහිතව දරුවන් වදන්නී යයි කී සේක.
- ශුද්ධ බයිබලය
ගැහැණියක වෙමි
ළය වසා ළැම ද
ගැබ වසා ඉඟ ද
වසා රොද වසා උකුළ ද
දරමි
දරුවන් දැරූයෙන් ද
දරුවන් වැදූයෙන්ද
දුකම විඳිමින්
දුකම දිනූයෙමි
කුල ගෙයට වඩා වැඩි සිත් උයන
ප්‍රේමයේ අස්වැන්න නෙලූයෙන්
ස්වාමීනි මම
මිනි‍සෙකුට ප්‍රේම කළ
ගැහැණියක වූයෙමි
සිහිනයෙන් සිල් බිදින අඟනුන් ද
දරුවන් සමඟ යන විට
මඟ අරා ඇස් වැසූ මිනිසුන් ද,
මේ මිනිස් පුත්‍රයා සුජාත ද
බෞතීස්මයට පෙර හගිස්සති
අසල්වැසියනි වරෙන්න
පුතු සිරුර රිදවමින් බලපන්න
මගේ ශෝකය නුඹේ ප්‍රීතියයි
නුඹේ ප්‍රීතිය මගේ දිනීමයි
ඉදින් මම
වේදනා වින්‍‍දෙමි
ශෝකයම දිනූයෙමි
2011
© Subhadra Jayasundara
